O. Henry nu’udar William Sydney Porter nia pseudónimo, no ho naran ida-ne’e mak nia sai hakerek-na’in história badak nian ne’ebé inclui entre sira ne’ebé naran-boot liu hotu iha literatura Estados Unidos nian, no iha literatura mundo tomak nian. Nia moris iha 11 de setembro de 1862, iha Greensboro, Carolina do Norte, EUA, no nia mate iha Nova Iorque iha 5 de junho de 1910.Iha 1920, quase exemplar milhão lima hussi ninia livro sira fa’an tiha ona iha EUA. Desde 1919 to’o agora, iha EUA iha prémio literário importante ida ne’ebé hili história badak sira ne’ebé kapás liu ne’ebé publica iha cada tinan ne’ebé tau ninia naran, maka “O. Henry Memorial Award Prize Stories”. Ninia história barak, inclui “Liurai Matenek sira-nia presente”, halo tiha ba filme sira iha cinema no iha televisão. Mesmo iha Rússia comunista sira publica tradução ba ninia história badak sira no ema barabarak gosta lê buat ne’ebé nia hakerek no hakerek-na’in barak buka atu hassara ninia jeito hodi hakerek história. La iha buat ida marxismo nian iha ninia histórias, maibé saida mak iha maka preocupação tebes ho desafio sira, ho tristeza no ho ksolok iha vida ema baibain nian, ema kbiit-laek, hussi povo.