Dou Berrus snommedoags noar hoes tou ging, haar e n beetje de smoor in. Zien kammeroaden waren dij middag goud aan t ouwehoeren west. En hai was aingoal t middelpunt van t geouwehoer west.

"Mit viefteg binnen je n oale kerel. Den hebben je ofdoan veur de soamenleven", haar zien beste kammeroad Paiter stiekeleg over t biljart rold.
"Trouw niet voor je vijftig bent " zong dikke Mans mit zien donkerbroene, deur swoare shag aansloagen haize stem en hai haar Berrus doorbie, laggend, mit duvelachtege, glimmer-oogies aankeken. Hai haar t nait verwacht, mor zulfs Grieto haar zok der mit bemuid en hom n veeg oet de panne geven: Mien opa wui nog voader dou e ol vieftig was.